Apne har har lafz ka khud aayina ho jayunga

Us ko chhota keh ke main kaise bada ho jayunga

Tum girane mea lage the tum ne socha hi nahin

Main gira to massala ban kar khada ho jayunga

Mujh ko chalne do akela hai abhi mera safar

Rasta roka gaya to qafila ho jayunga

Saari duniya ki nazar mea hai mera ahd-e-vafa

Ik tere kehne se kya main bewafa ho jayunga

…………………………………………………………………………………………………………………………

Aate aate mera naam sa reh gaya

Us ke honton pe kuchh kanpta reh gaya

Raat mujrim thi daman bacha le gayi

Din gavahon ki saf mea khada reh gaya

Vo mire samne hi gaya aur main

Raste ki tareh dekhta reh gaya

Jhoot vaale kehin se kehin badh gaye

Aur main tha ki sach bolta reh gaya

Andhiyon ke irade to achchhe na the

Ye diya kaise jalta hua reh gaya

Us ko kandhon pe le ja rehe hain ‘vasim’

Aur vo jeene ka haq mangta reh gaya

…………………………………………………………………………………………………………………………

Apne chehre se jo zahir hai chhupayen kaise

Teri marzi ke mutabiq nazar aayen kaise

Ghar sajane ka tasavvur to bahut ba.ad ka hai

Pahle ye tai ho ki is ghar ko bachayen kaise

Laakh talvaren badhi aati hon gardan ki taraf

Sar jhukana nahin aata to jhukayen kaise

Qahqaha aankh ka bartao badal deta hai

Hansne vaale tujhe aansu nazar aayen kaise

Phool se rang juda hona koi khel nahin

Apni mitti ko kehin chhod ke jaayen kaise

Koi apni hi nazar se to humea dekhega

Ek qatre ko samundar nazar aayen kaise

Jis ne danista kiya ho nazar-andaz ‘vasim’

Us ko kuchh yaad dilayen to dilayen kaise

…………………………………………………………………………………………………………………………

Mohabbat na-samajh hoti hai samjhana zaruri hai

Jo dil mea hai use ankhon se kehlana zaruri hai

Usulon par jahan aanch aaye takrana zaruri hai

Jo zinda ho to phir zinda nazar aana zaruri hai

Nayi umron ki khud-mukhtariyon ko kaun samjhaye

Kehan se bach ke chalna hai kehan jaana zaruri hai

Thake-hare parinde jab basere ke liye lauten

Saliqa-mand shakhon ka lachak jaana zaruri hai

Bahut bebak ankhon mea ta’alluq tik nahin paata

Mohabbat mea kashish rakhne ko sharmana zaruri hai

Saliqa hi nahin shayad use mahsus karne ka

Jo kehta hai khuda hai to nazar aana zaruri hai

Mire honton pe apni pyaas rakh do aur phir socho

Ki is ke ba.ad bhi duniya mea kuchh paana zaruri hai

…………………………………………………………………………………………………………………………

Kya dukh hai samundar ko bata bhi nahin sakta

Aansu ki tareh aankh tak aa bhi nahin sakta

Tu chhod reha hai to khata is mea tiri kya

Har shakhs mera saath nibha bhi nahin sakta

Pyase rehe jaate hain zamane ke savalat

Kis ke liye zinda hun bata bhi nahin sakta

Ghar dhund rehe hain mera raton ke pujari

Main hun ki charaghon ko bujha bhi nahin sakta

Vaise to ik aansu hi baha kar mujhe le jaaye

Aise koi tufan hila bhi nahin sakta

…………………………………………………………………………………………………………………………

Main is umiid pe duuba ki tu bacha lega

Ab is ke ba.ad mera imtihan kya lega

Ye ek mela hai va.ada kisi se kya lega

Dhalega din to har ik apna rasta lega

Main bujh gaya to humesha ko bujh hi jayunga

Koi charagh nahin hun ki phir jala lega

Kaleja chahiye dushman se dushmani ke liye

Jo be-amal hai vo badla kisi se kya lega

Main us ka ho nahin sakta bata na dena use

Lakiren haath ki apni vo sab jala lega

Hazar tod ke aa ja.un us se rishta ‘vasim’

Main janta hun vo jab chahega bula lega

……………………………………………………………………………………………………………………………………………………..

Dukh apna agar hum ko batana nahin aata

Tum ko bhi to andaza lagana nahin aata

Pahuncha hai buzurgon ke bayanon se jo hum tak

Kya baat hui kyuun vo zamana nahin aata

Main bhi use khone ka hunar siikh na paaya

Us ko bhi mujhe chhod ke jaana nahin aata

Is chhote zamane ke bade kaise banoge

Logon ko jab aapas mea ladana nahin aata

Dhundhe hai to palkon pe chumakne ke bahane

Aansu ko meri aankh mea aana nahin aata

Tarikh ki ankhon mea dhuan ho gaye khud hi

Tum ko to koi ghar bhi jalana nahin aata

………………………………………………………………………………………………………………………………………………..

Chand ka khwab ujalon ki nazar lagta hai

Tu jidhar ho ke guzar jaaye khabar lagta hai

Us ki yadon ne uga rakkhe hain suraj itne

Shaam ka waqt bhi aaye to sahar lagta hai

Ek manzar pe thaharne nahin deti fitrat

Umr bhar aankh ki qismat mea safar lagta hai

Main nazar bhar ke tere jism ko jab dekhta hun

Pahli barish mea nahaya sa shajar lagta hai

Be-sahara tha bahut pyaar koi puchhta kya

Tu ne kandhe pe jagah di hai to sar lagta hai

Teri qurbat ke ye lamhe use raas aayen kya

Subhe hone ka jise shaam se dar lagta hai

………………………………………………………………………………………………………………………………………………………..

Zara sa qatra kehin aaj agar ubharta hai

Samundaron hi ke lahje mea baat karta hai

Khuli chhaton ke diye kab ke bujh gaye hote

Koi to hai jo havaon ke par katarta hai

Sharafaton ki yahan koi ahmiyat hi nahin

Kisi ka kuchh na bigado to kaun darta hai

Ye dekhna hai ki sahra bhi hai samundar bhi

Vo meri tishna-labi kis ke naam karta hai

Tum aa gaye ho to kuchh chandni si baten hon

Zamin pe chand kehan roz roz utarta hai

Zamin ki kaisi vakalat ho phir nahin chalti

Jab asman se koi faisla utarta hai

………………………………………………………………………………………………………………………………………………………..

Bhala ghumon se kehan har jaane vaale the

Hum ansuon ki tareh muskurane vaale the

Humin ne kar diya elan-e-gumrehi varna

Humare pichhe bahut log aane vaale the

Unhen to khaak mea milna hi tha ki mere the

Ye ashk kaun se unche gharane vaale the

Unhen qarib na hone diya kabhi main ne

Jo dosti mea haden Bhool jaane vaale the

Main jin ko jaan ke pahchan bhi nahin sakta

Kuchh aise log mera ghar jalane vaale the

Humara alamiya ye tha ki hum-safar bhi humea

Vahi mile jo bahut yaad aane vaale the

‘Vasim’ kaisi ta.alluq ki raah thi jis mea

Vahi mile jo bahut dil dukhane vaale the

…………………………………………………………………………………………………………………………………………………..

Vo mere ghar nahin aata main us ke ghar nahin jaata

Magar in ehtiyaton se ta.alluq mar nahin jaata

Bure achchhe hon jaise bhi hon sab rishte yahin ke hain

Kisi ko saath duniya se koi le kar nahin jaata

Gharon ki tarbiyat kya aa gayi t-v ke hathon mea

Koi bachcha ab apne baap ke uupar nahin jaata

Khule the shahr mea sau dar magar ik had ke andar hi

Kehan jaata agar main laut ke phir ghar nahin jaata

Mohabbat ke ye aansu hain unhen ankhon mea rehne do

Sharifon ke gharon ka mas.ala bahar nahin jaata

‘Vasim’ us se keho duniya bahut mahdud hai meri

Kisi dar ka jo ho jaaye vo phir dar dar nahin jaata

……………………………………………………………………………………………………………………………………………………

Main asman pe bahut der reh nahin sakta

Magar ye baat zamin se to keh nahin sakta

Kisi ke chehre ko kab tak nigah mea rakkhun

Safar mea ek hi manzar to reh nahin sakta

Ye azmane ki fursat tujhe kabhi mil jaaye

Main ankhon ankhon mea kya baat keh nahin sakta

Sahara lena hi padta hai mujh ko dariya ka

Main ek qatra hun tanha to bah nahin sakta

Laga ke dekh le jo bhi hisab aata ho

Mujhe ghata ke vo ginti mea reh nahin sakta

Ye chand lamhon ki be-ikhtiyariyan hain ‘vasim’

Gunah se rishta bahut der reh nahin sakta

…………………………………………………………………………………………………………………………………………………..

Lahu na ho to qalam tarjuman nahin hota

Humare daur mea aansu zaban nahin hota

Jahan rehega vahin raushni lutayega

Kisi charagh ka apna makan nahin hota

Ye kis maqam pe laayi hai meri tanhayi

Ki mujh se aaj koi bad-guman nahin hota

Bas ik nigah meri raah dekhti hoti

Ye saara shahr mera mezban nahin hota

Tera khayal na hota to kaun samjhata

Zamin na ho to koi asman nahin hota

Main us ko Bhool gaya hun ye kaun manega

Kisi charagh ke bas mea dhuan nahin hota

‘Vasim’ sadiyon ki ankhon se dekhiye mujh ko

Vo lafz hun jo kabhi dastan nahin hota

…………………………………………………………………………………………………………………………………………………..

Hadson ki zad pe hain to muskurana chhod den

Zalzalon ke khauf se kya ghar banana chhod den

Tum ne mere ghar na aane ki qasam khaayi to hai

Ansuon se bhi keho ankhon mea aana chhod den

Pyaar ke dushman kabhi to pyaar se keh ke to dekh

Ek tera dar hi kya hum to zamana chhod den

Ghonsle viran hain ab vo parinde hi kehan

Ik basere ke liye jo ab-o-dana chhod den

…………………………………………………………………………………………………………………………

Andhera zehn ka samt-e-safar jab khone lagta hai

Kisi ka dhyan aata hai ujala hone lagta hai

Vo jitni duur ho utna hi mera hone lagta hai

Magar jab paas aata hai to mujh se khone lagta hai

Kisi ne rakh diye mamta-bhare do haath kya sar par

Mire andar koi bachcha bilak kar rone lagta hai

Mohabbat char din ki aur udasi zindagi bhar ki

Yahi sab dekhta hai aur ‘kabira’ rone lagta hai

Samajhte hi nahin nadan kai din ki hai milkiyyat

Paraye kheton pe apnon mea jhagda hone lagta hai

Ye dil bach kar zamane bhar se chalna chahe hai lekin

Jab apni raah chalta hai akela hone lagta hai

………………………………………………………………………………………………………………………

Apne saaye ko itna samjhane de

Mujh tak mere hisse ki dhuup aane de

Ek nazar mea kayi zamane dekhe to

Budhi ankhon ki tasvir banane de

Baaba duniya jiit ke main dikhla dunga

Apni nazar se duur to mujh ko jaane de

Main bhi to is baagh ka ek parinda hun

Meri hi avaz mea mujh ko gaane de

Phir to ye uncha hi hota jayega

Bachpan ke hathon mea chand aa jaane de

Faslen pak jaayen to khet se bichhdengi

Roti aankh ko pyaar kehan samjhane de

………………………………………………………………………………………………………………………

Sab ne milaye haath yahan tirgi ke saath

Kitna bada mazaq hua raushni ke saath

Sharten lagayi jaati nahin dosti ke saath

Kiije mujhe qubul meri har kami ke saath

Tera khayal, teri talab teri aarzu

Main umr bhar chala hun kisi raushni ke saath

Duniya mire khilaf khadi kaise ho gayi

Meri to dushmani bhi nahin thi kisi ke saath

Kis kaam ki rehi ye dikhave ki zindagi

Vaade kiye kisi se guzari kisi ke saath

Duniya ko bewafayi ka ilzam kaun de

Apni hi nibh saki na bahut din kisi ke saath

Qatre vo kuchh bhi paayen ye mumkin nahin ‘vasim’

Badhna jo chahte hain samundar-kashi ke saath

………………………………………………………………………………………………………………………

Kitna dushvar tha duniya ye hunar aana bhi

Tujh se hi fasla rakhna tujhe apnana bhi

Kaisi adab-e-numayish ne lagayin sharten

Phool hona hi nahin phool nazar aana bhi

Dil ki bigdi hui aadat se ye ummid na thi

Bhool jayega ye ik din tera yaad aana bhi

Jaane kab shahr ke rishton ka badal jaaye mizaj

Itna asan to nahin laut ke ghar aana bhi

Aise rishte ka bharam rakhna koi khel nahin

Tera hona bhi nahin aur tera kehlana bhi

khud ko pahchan ke dekhe to zara ye dariya

Bhool jayega samundar ki taraf jaana bhi

Janne valon ki is bhiid se kya hoga ‘vasim’

Is mea ye dekhiye koi mujhe pahchana bhi

……………………………………………………………………………………………………………………

Jahan dariya kehin apne kinare chhod deta hai

Koi uthta hai aur tufan ka rukh mod deta hai

Mujhe be-dast-o-pa kar ke bhi khauf us ka nahin jaata

Kehin bhi hadisa guzre vo mujh se jod deta hai

Bichhad ke tujh se kuchh jaana agar to is qadar jaana

Vo mitti hun jise dariya kinare chhod deta hai

Mohabbat mea zara si bewafayi to zaruri hai

Vahi achchha bhi lagta hai jo va.ade tod deta hai

……………………………………………………………………………………………………………………

Apne andaz ka akela tha

Is liye main bada akela tha

Pyaar to janm ka akela tha

Kya mera tajraba akela tha

Saath tera na kuchh badal paaya

Mera hi rasta akela tha

Bakhshish-e-be-hisab ke aage

Mera dast-e-dua akela tha

Teri samjhaute-baz duniya mea

Kaun mere siva akela tha

Jo bhi milta gale laga leta

Kis qadar aayina akela tha

……………………………………..

Shaam tak subhe ki nazron se utar jaate hain

Itne samjhauton pe jeete hain ki mar jaate hain

Phir vahi talkhi-e-halat muqaddar thahri

Nashshe kaise bhi hon kuchh din mea utar jaate hain

Ik judayi ka vo lamha ki jo marta hi nahin

Log kehte the ki sab waqt guzar jaate hain

Ghar ki girti hui divaren hi mujh se achchhi

Rasta chalte hue log thahar jaate hain

Hum to be-nam iradon ke musafir hain ‘vasim’

Kuchh pata ho to batayen ki kidhar jaate hain

…………………………………..

Khul ke milne ka saliqa aap ko aata nahin

Aur mere paas koi chor darvaza nahin

Vo samajhta tha use pa kar hi main reh jayunga

Us ko meri pyaas ki shiddat ka andaza nahin

Ja dikha duniya ko mujh ko kya dikhata hai ghurur

Tu samundar hai to hai main to magar pyasa nahin

Koi bhi dastak kare aahat ho ya avaz de

Mere hathon mea mera ghar to hai darvaza nahin

Apnon ko apna keha chahe kisi darje ke hon

Aur jab aisa kiya main ne to sharmaya nahin

Us ki mahfil mea unhin ki raushni jin ke charagh

Main bhi kuchh hota to mera bhi diya hota nahin

Tujh se kya bichhda meri saari haqiqat khul gayi

Ab koi mausam mile to mujh se sharmata nahin

………………………………..

Humara azm-e-safar kab kidhar ka ho jaaye

Ye vo nahin jo kisi rehguzar ka ho jaaye

Usi ko jeene ka haq hai jo is zamane mea

Idhar ka lagta rehe aur udhar ka ho jaaye

Khuli havaon mea udna to us ki fitrat hai

Parinda kyuun kisi shakh-e-shajar ka ho jaaye

Main laakh chahun magar ho to ye nahin sakta

Ki tera chehra meri hi nazar ka ho jaaye

Mera na hone se kya farq us ko padna hai

Pata chale jo kisi kam-nazar ka ho jaaye

‘Vasim’ subhe ki tanhayi-e-safar socho

Mushayera to chalo raat bhar ka ho jaaye

…………………………………..

Ye hai to sab ke liye ho ye zid humari hai

Is ek baat pe duniya se jang jaari hai

Udaan vaalo udanon pe waqt bhari hai

Paron ki ab ke nahin hauslon ki baari hai

Main qatra ho ke bhi tufan se jang leta hun

Mujhe bachana samundar ki zimmedari hai

Isi se jalte hain sahra-e-arzu mea charagh

Ye tishnagi to mujhe zindagi se pyari hai

Koi bataye ye us ke ghurur-e-beja ko

Vo jang main ne ladi hi nahin jo hari hai

Har ek saans pe pahra hai be-yaqini ka

Ye zindagi to nahin maut ki savari hai

Dua karo ki salamat rehe meri himmat

Ye ik charagh kayi andhiyon pe bhari hai

…………………………………………………

Duur se hi bas dariya dariya lagta hai

Duub ke dekho kitna pyasa lagta hai

Tanha ho to ghabraya sa lagta hai

Bhiid mea us ko dekh ke achchha lagta hai

Aaj ye hai kal aur yahan hoga koi

Socho to sab khel-tamasha lagta hai

Main hi na manun mere bikharne mea varna

Duniya bhar ko haath tumhara lagta hai

Zehn se kaghaz par tasvir utarte hi

Ek musavvir kitna akela lagta hai

Pyaar ke is nashsha ko koi kya samjhe

Thokar mea jab saara zamana lagta hai

Bhiid mea reh kar apna bhi kab reh paata

Chand akela hai to sab ka lagta hai

Shakh pe baithi bholi-bhali ik chidiya

Kya jaane us par bhi nishana lagta hai

………………………………………….

Biite hue din khud ko jab dohrate hain

Ek se jaane hum kitne ho jaate hain

Hum bhi dil ki baat kehan keh paate hain

Aap bhi kuchh kehte kehte reh jaate hain

khushbu apne raste khud tai karti hai

Phool to daali ke ho kar reh jaate hain

Roz naya ik qissa kehne vaale log

Kehte kehte khud qissa ho jaate hain

Kaun bachayega phir todne valon se

Phool agar shakhon se dhoka khate hain

…………………………………

Mere ghum ko jo apna batate rehe

Waqt padne pe hathon se jaate rehe

Barishen aayiin aur faisla kar gayiin

Log tuuti chhaten azmate rehe

Ankhen manzar huiin kaan naghma hue

Ghar ke andaz hi ghar se jaate rehe

Shaam aayi to bichhde hue hum-safar

Ansuon se in ankhon mea aate rehe

Nanhe bachchon ne chhu bhi liya chand ko

Budhe baaba kehani sunate rehe

Duur tak haath mea koi patthar na tha

Phir bhi hum jaane kyuun sar bachate rehe

Shayiri zahr thi kya karen ai ‘vasim’

Log piite rehe hum pilate rehe

……………………………………..

Tu samajhta hai ki rishton ki duhayi denge

Hum to vo hain tere chehre se dikhayi denge

Hum ko mahsus kiya jaaye hai khushbu ki tareh

Hum koi shor nahin hain jo sunayi denge

Faisla likkha hua rakkha hai pahle se khilaf

Aap kya khaak adalat mea safayi denge

Pichhli saf mea hi sahi hai to isi mahfil mea

Aap dekhenge to hum kyuun na dikhayi denge

…………………………………………….

Mujhe to qatra hi hona bahut satata hai

Isi liye to samundar pe rehm aata hai

Vo is tareh bhi meri ahmiyat ghatata hai

Ki mujh se milne mea sharten bahut lagata hai

Bichhadte waqt kisi aankh mea jo aata hai

Tamam umr vo aansu bahut rulata hai

Kehan pahunch gayi duniya use pata hi nahin

Jo ab bhi maazi ke qisse sunaye jaata hai

Uthaye jaayen jahan haath aise jalse mea

Vahi bura jo koi mas.ala uthata hai

Na koi ohda na degrē na naam ki takhti

Main reh reha hun yahan mera ghar batata hai

Samajh reha ho kehin khud ko meri kamzori

To us se keh do mujhe bhulna bhi aata hai

……………………………..

Chalo hum hi pahal kar den ki hum se bad-guman kyuun ho

Koi rishta zara si zid ki khatir rayegan kyuun ho

Main zinda hun to is zinda-zameri ki badaulat hi

Jo bole tere lahje mea bhala meri zaban kyuun ho

Saval akhir ye ik din dekhna hum hi uthayenge

Na samjhe jo zamin ke ghum vo apna asman kyuun ho

Humari guftugu ki aur bhi samten bahut si hain

Kisi ka dil dukhane hi ko phir apni zaban kyuun ho

Bikhar kar reh gaya humsayegi ka khwab hi varna

Diye is ghar mea raushan hon to us ghar mea dhuan kyuun ho

Mohabbat asman ko jab zamin karne ki zid thahri

To phir buzdil usulon ki sharafat darmiyan kyuun ho

Ummiden saari duniya se ‘vasim’ aur khud mea aise ghum

Kisi pe kuchh na zahir ho to koi mehrban kyuun ho

………………………………..

Main ye nahin kehta ki mera sar na milega

Lekin meri ankhon mea tujhe dar na milega

Sar par to bithane ko hai tayyar zamana

Lekin tere rehne ko yahan ghar na milega

Jaati hai chali jaaye ye mai-khane ki raunaq

Kam-zarfon ke hathon mea to saghar na milega

Duniya ki talab hai to qana.at hi na karna

Qatre hi se khush ho to samundar na milega

………………………………….

Kuchh itna khauf ka maara hua bhi pyaar na ho

Vo e’tibar dilaye aur e’tibar na ho

Hava khilaf ho maujon pe ikhtiyar na ho

Ye kaisi zid hai ki dariya kisi se paar na ho

Main gaanv laut reha hun bahut dinon ke baad

khuda kare ki use mera intizar na ho

Zara si baat pe ghut ghut ke subhe kar dena

Meri tareh bhi koi mera ghum-gusar na ho

Dukhi samaj mea aansu bhare zamane mea

Use ye kaun bataye ki ashk-bar na ho

Gunahgaron pe ungli uthaye dete ho

‘Vasim’ aaj kehin tum bhi sangsar na ho

…………………………………….

Vo mujh ko kya batana chahta hai

Jo duniya se chhupana chahta hai

Mujhe dekho ki main us ko hi chahun

Jise saara zamana chahta hai

Qalam karna kehan hai us ka mansha

Vo mera sar jhukana chahta hai

Shikayat ka dhuan ankhon se dil tak

Ta.alluq tuut jaana chahta hai

Taqaza waqt ka kuchh bhi ho ye dil

Vahi qissa purana chahta hai

………………………………..

Use samajhne ka koi to rasta nikle

Main chahta bhi yahi tha vo bewafa nikle

Kitab-e-mazi ke auraq ulat ke dekh zara

Na jaane kaun sa saf.ha muda hua nikle

Main tujh se milta to tafsil mea nahin jaata

Meri taraf se tere dil mea jaane kya nikle

Jo dekhne mea bahut hi qarib lagta hai

Usi ke baare mea socho to fasla nikle

Tamam shahr ki ankhon mea surkh sho.ale hain

‘Vasim’ ghar se ab aise mea koi kya nikle

………………………………….

Hum apne aap ko ik mas.ala bana na sake

Isi liye to kisi ki nazar mea aa na sake

Hum ansuon ki tareh vaste nibha na sake

Rehe jin ankhon mea un mea hi ghar bana na sake

Phir andhiyon ne sikhaya vahan safar ka hunar

Jahan charagh humea rasta dikha na sake

Jo pesh pesh the basti bachane valon mea

Lagi jab aag to apna bhi ghar bacha na sake

Mire khuda kisi aisi jagah use rakhna

Jahan koi mire baare mea kuchh bata na sake

Tamam umr ki koshish ka bas yahi hasil

Kisi ko apne mutabiq koi bana na sake

Tasalliyon pe bahut din jiya nahin jaata

Kuchh aisa ho ke tera e.atibar aa na sake

…………………………………

Nahin ki apna zamana bhi to nahin aaya

Humea kisi se nibhana bhi to nahin aaya

Jala ke rakh liya hathon ke saath daman tak

Tumhen charagh bujhana bhi to nahin aaya

Naye makan banaye to faslon ki tareh

Humea ye shahr basana bhi to nahin aaya

Vo puchhta tha meri aankh bhigne ka sabab

Mujhe bahana banana bhi to nahin aaya

‘Vasim’ dekhna mud mud ke vo usi ki taraf

Kisi ko chhod ke jaana bhi to nahin aaya

…………………………………….

Tahrir se varna meri kya ho nahin sakta

Ik tu hai jo lafzon mea ada ho nahin sakta

Ankhon mea khayalat mea sanson mea basa hai

Chahe bhi to mujh se vo juda ho nahin sakta

Jiina hai to ye jabr bhi sahna hi padega

Qatra hun samundar se khafa ho nahin sakta

Gumreh kiye honge kayi phool se jazbe

Aise to koi reh-numa ho nahin sakta

Qad mera badhane ka use kaam mila hai

Jo apne hi pairon pe khada ho nahin sakta

Ai pyaar tere hisse mea aaya tiri qismat

Vo dard jo chehron se ada ho nahin sakta

……………………………….

Tumhari raah mea mitti ke ghar nahin aate

Isi liye to tumhen hum nazar nahin aate

Mohabbaton ke dinon ki yahi kharabi hai

Ye ruuth jaayen to phir laut kar nahin aate

Jinhen saliqa hai tahzib-e-ghum samajhne ka

Unhin ke rone mea aansu nazar nahin aate

khushi ki aankh mea aansu ki bhi jagah rakhna

Bure zamane kabhi puchh kar nahin aate

Bisat-e-ishq pe badhna kise nahin aata

Ye aur baat ki bachne ke ghar nahin aate

‘Vasim’ zehn banate hain to vahi akhbar

Jo le ke ek bhi achchhi khabar nahin aate

……………………………

Kya batayunkaisa khud ko dar-ba-dar main ne kiya

Umr-bhar kis kis ke hisse ka safar main ne kiya

Tu to nafrat bhi na kar payega is shiddat ke saath

Jis bala ka pyaar tujh se be-khabar main ne kiya

Kaise bachchon ko batayunraston ke pech-o-khum

Zindagi-bhar to kitabon ka safar main ne kiya

Kis ko fursat thi ki batlata tujhe itni si baat

khud se kya bartav tujh se chhut kar main ne kiya

Chand jazbati se rishton ke bachane ko ‘vasim’

Kaisa kaisa jabr apne aap par main ne kiya

……………………………………

Udasiyon mea bhi raste nikal leta hai

Ajiib dil hai girun to sambhal leta hai

Ye kaisa shakhs hai kitni hi achchhi baat keho

Koi burayi ka pahlu nikal leta hai

Dhale to hoti hai kuchh aur ehtiyat ki umr

Ki bahte bahte ye dariya uchhal leta hai

Bade-badon ki tareh-dariyan nahin chaltin

Uruuj teri khabar jab zaval leta hai

Jab us ke jaam mea ik buund tak nahin hoti

Vo meri pyaas ko phir bhi sambhal leta hai

…………………………..

Nigahon ke taqaze chain se marne nahin dete

Yahan manzar hi aise hain ki dil bharne nahin dete

Ye log auron ke dukh jeene nikal aaye hain sadkon par

Agar apna hi ghum hota to yuun dharne nahin dete

Yahi qatre jo dam apna dikhane par utar aate

Samundar aisi man-mani tujhe karne nahin dete

Qalam main to utha ke jaane kab ka rakh chuka hota

Magar tum ho ke qissa mukhtasar karne nahin dete

Humin un se umiden asman chhune ki karte hain

Humin bachchon ko apne faisle karne nahin dete

…………………………..

Kehan savab kehan kya azaab hota hai

Mohabbaton mea kab itna hisab hota hai

Bichhad ke mujh se tum apni kashish na kho dena

Udaas rehne se chehra kharab hota hai

Use pata hi nahin hai ki pyaar ki baazi

Jo har jaaye vahi kamyab hota hai

Jab us ke paas ganvane ko kuchh nahin hota

To koi aaj ka izzat-ma.ab hota hai

Jise main likhta hun aise ki khud hi padh paanv

Kitab-e-zist mea aisa bhi baab hota hai

Bahut bharosa na kar lena apni ankhon par

Dikhayi deta hai jo kuchh vo khwab hota hai

………………………………..

Sabhi ka dhuup se bachne ko sar nahin hota

Har aadmi ke muqaddar mea ghar nahin hota

Kabhi lahu se bhi tarikh likhni padti hai

Har ek ma.arka baton se sar nahin hota

Main us ki aankh ka aansu na ban saka varna

Mujhe bhi khaak mea milne ka dar nahin hota

Mujhe talash karoge to phir na paoge

Main ik sada hun sadaon ka ghar nahin hota

Humari aankh ke aansu ki apni duniya hai

Kisi faqir ko shahon ka dar nahin hota

Main us makan mea rehta hun aur zinda hun

‘Vasim’ jis mea hava ka guzar nahin hota

……………………………….

Tum saath nahin ho to kuchh achchha nahin lagta

Is shahr mea kya hai jo adhura nahin lagta

Siine se lipatte hi palat jaane pe khush hain

Lahron ko kinaron pe bharosa nahin lagta

khud-gharz bana deti hai shiddat ki talab bhi

Pyase ko koi dusra pyasa nahin lagta

Har saal naye patte badal dete hain tevar

Budha hai magar ped purana nahin lagta

……………………………….

Haveliyon mea meri tarbiyat nahin hoti

To aaj sar pe tapakne ko chhat nahin hoti

Humare ghar ka pata puchhne se kya hasil

Udasiyon ki koi shahriyat nahin hoti

Charagh ghar ka ho mahfil ka ho ki mandir ka

Hava ke paas koi maslahat nahin hoti

Humea jo khud mea simatne ka fan nahin aata

To aaj aisi tiri saltanat nahin hoti

‘Vasim’ shahr mea sachchayiyon ke lab hote

To aaj khabron mea sab khairiyat nahin hoti

…………………………..

Zindagi tujh pe ab ilzam koi kya rakkhe

Apna ehsas hi aisa hai jo tanha rakkhe

Kin shikaston ke shab-o-roz se guzra hoga

Vo musavvir jo har ik naqsh adhura rakkhe

khushk mitti hi ne jab paanv jamane na diye

Bahte dariya se phir ummid koi kya rakkhe

Aa ghum-e-dost usi mod pe ho ja.un juda

Jo mujhe mera hi rehne de na tera rakkhe

Arzuon ke bahut khwab to dekho ho ‘vasim’

Jaane kis haal mea be-dard zamana rakkhe

………………………………..

Dua karo ki koi pyaas nazr-e-jam na ho

Vo zindagi hi nahin hai jo na-tamam na ho

Jo mujh mea tujh mea chala aa reha hai sadiyon se

Kehin hayat usi fasle ka naam na ho

Koi charagh na aansu na arzu-e-sahar

khuda kare ki kisi ghar mea aisi shaam na ho

Ajiib shart lagayi hai ehtiyaton ne

Ki tera zikr karun aur tera naam na ho

Saba-mizaj ki tezi bhi ek ne.amat hai

Agar charagh bujhana hi ek kaam na ho

‘Vasim’ kitni hi subheen lahu lahu guzrin

Ik aisi subhe bhi aaye ki jis ki shaam na ho

………………………

Meri vafaon ka nashsha utarne vaala

Kehan gaya mujhe hans hans ke harne vaala

Humari jaan gayi jaaye dekhna ye hai

Kehin nazar mea na aa jaaye marne vaala

Bas ek pyaar ki baazi hai be-gharaz baazi

Na koi jitne vaala na koi harne vaala

Bhare makan ka bhi apna nasha hai kya jaane

Sharab-khane mea raten guzarne vaala

Main us ka din bhi zamane mea baant kar rakh duun

Vo meri raton ko chhup kar guzarne vaala

‘Vasim’ hum bhi bikharne ka hausla karte

Humea bhi hota jo koi sanvarne vaala

……………………………..

Sirf tera naam le kar reh gaya

Aaj divana bahut kuchh keh gaya

Kya meri taqdir mea manzil nahin

Fasla kyuun muskura kar reh gaya

Zindagi duniya mea aisa ashk thi

Jo zara palkon pe thahra bah gaya

Aur kya tha us ki pursish ka javab

Apne hi aansu chhupa kar reh gaya

Us se puchh ai kamyab-e-zindagi

Jis ka afsana adhura reh gaya

Haaye kya divangi thi ai ‘vasim’

Jo na kehna chahiye tha keh gaya

……………………………….

Kehan qatre ki ghum-khvari kare hai

Samundar hai adakari kare hai

Koi maane na maane us ki marzi

Magar vo hukm to jaari kare hai

Nahin lamha bhi jis ki dastaras mea

Vahi sadiyon ki tayyari kare hai

Bade adarsh hain baton mea lekin

Vo saare kaam bazari kare hai

Humari baat bhi aaye to janen

Vo baten to bahut saari kare hai

Yahi akhbar ki surkhi banega

Zara sa kaam chingari kare hai

Bulava aayega chal denge hum bhi

Safar ki kaun tayyari kare hai

……………………………..

Safar pe aaj vahi kashtiyan nikalti hain

Jinhen khabar hai havayen bhi tez chalti hain

Meri hayat se shayad vo mod chhut gaye

Baghair samton ke rehen jahan nikalti hain

Humare baare mea likhna to bas yahi likhna

Kehan ki shum’en hain kin mahfilon mea jalti hain

Bahut qarib hue ja rehe ho socho to

Ki itni qurbaten jismon se kab sanbhalti hain

‘Vasim’ aao in ankhon ko ghaur se dekho

Yahi to hain jo mire faisle badalti hain

……………………………….

Vo mere balon mea yuun ungliyan phirata tha

Ki asman ke farishton ko pyaar aata tha

Use gulab ki patti ne qatl kar daala

Vo sab ki rehon mea kante bahut bichhata tha

Tumhare saath nigahon ka karobar gaya

Tumhare ba.ad nigahon mea kaun aata tha

Safar ke saath safar ke naye masayil the

Gharon ka zikr to raste mea chhut jaata tha

……………………………….

Rang be-rang hon khushbu ka bharosa jaaye

Meri ankhon se jo duniya tujhe dekha jaaye

Hum ne jis raah ko chhoda phir use chhod diya

Ab na jayenge udhar chahe zamana jaaye

Main ne muddat se koi khwab nahin dekha hai

Haath rakh de meri ankhon pe ki niind aa jaaye

Main gunahon ka taraf-dar nahin hun phir bhi

Raat ko din ki nigahon se na dekha jaaye

Kuchh badi sochon mea ye sochen bhi shumil hain ‘vasim’

Kis bahane se koi shahr jalaya jaaye

…………………………

Main apne khwab se bichhda nazar nahin aata

To is sadi mea akela nazar nahin aata

Ajab dabao hai un bahari havaon ka

Gharon ka bojh bhi uthta nazar nahin aata

Main teri raah se ha.tne ko hat gaya lekin

Mujhe to koi bhi rasta nazar nahin aata

Main ik sada pe humesha ko ghar to chhod aaya

Magar pukarne vaala nazar nahin aata

Dhuan bhara hai yahan to sabhi ki ankhon mea

Kisi ko ghar mera jalta nazar nahin aata

Ghazal-sarayi ka da.ava to sab kare hain ‘vasim’

Magar vo ‘mir’ sa lahja nazar nahin aata

…………………………….

Tamam umr bade sakht imtihan mea tha

Vo fasla jo tere mere darmiyan mea tha

Paron mea simta to thokar mea tha zamane ki

Uda to ek zamana meri udaan mea tha

Usi pe ho gaya qurban do dilon ka milap

Vo jayedad ka jhagda jo khandan mea tha

Tujhe ganva ke kayi baar ye khayal aaya

Tiri ana hi mea kuchh tha na meri aan mea tha

…………………………….

Tumhen ghumon ka samajhna agar na aayega

To meri aankh mea aansu nazar na aayega

Ye zindagi ka musafir ye be-vafa lamha

Chala gaya to kabhi laut kar na aayega

Banenge unche makanon mea baith kar naqshe

To apne hisse mea mitti ka ghar na aayega

Mana rehe hain bahut din se jashn-e-tishna-labi

Humea pata tha ye badal idhar na aayega

Lagegi aag to samt-e-safar na dekhegi

Makan shahr mea koi nazar na aayega

‘Vasim’ apne andheron ka khud ilaaj karo

Koi charagh jalane idhar na aayega

………………………….

Us ne meri raah na dekhi aur vo rishta tod liya

Jis rishte ki khatir mujh se duniya ne munh mod liya

Badi badi khushiyon ko haan nazdik se ja kar dekha to

Main ne raah ke chalte-phirte dukh se naata jod liya

Main kitne rangon mea dhalta kab tak khud se lad paata

Jivan ek safar tha jis ne roz naya ik mod liya

Aise shakhs ko miir banaya jo bas khwab dikhata tha

Basti ke logon ne apna-ap muqaddar phod liya

Main to bhola-bhala ‘vasim’ aur vo fankar siyasat ka

Us ke jab ghatne ki baari aayi mujh ko jod liya

……………………………….

Tujh ko socha to pata ho gaya rusvayi ko

Main ne mahfuz samajh rakkha tha tanhayi ko

Jism ki chaah lakiron se ada karta hai

khaak samjhega musavvir tiri angdayi ko

Apni dariyayi pe itra na bahut ai dariya

Ek qatra hi bahut hai tiri rusvayi ko

Chahe jitna bhi bigad jaaye zamane ka chalan

Jhoot se harte dekha nahin sachchayi ko

Saath maujon ke sabhi hon jahan bahne vaale

Kaun samjhega samundar tiri gahrayi ko

Apni tanhayi bhi kuchh kam na thi masruf ‘vasim’

Is liye chhod diya anjuman-arayi ko

………………………………

Mili havaon mea udne ki vo saza yaaro

Ki main zamin ke rishton se kat gaya yaaro

Vo be-khayal musafir mea rasta yaaro

Kehan tha bas mea mire us ko rokna yaaro

Mire qalam pe zamane ki gard aisi thi

Ki apne baare mea kuchh bhi na likh saka yaaro

Tamam shahr hi jis ki talash mea gum tha

Main us ke ghar ka pata kis se puchhta yaaro

Jo be-shumar dilon ki nazar mea rehta tha

Vo apne bachchon ko ik ghar na de saka yaaro

Janab-e-‘mir’ ki khud-gharziyon ke sadqe mea

Miyan ‘vasim’ ke kehne ko kya bacha yaaro

………………………………….

Mujhe bujha de mera daur mukhtasar kar de

Magar diye ki tareh mujh ko mo’atabar kar de

Bikharte tutte rishton ki umr hi kitni

Main teri shaam hun aa ja meri sahar kar de

Judayiyon ki ye raten to katni hongi

Kehaniyon ko koi kaise mukhtasar kar de

Tere khayal ke hathon kuchh aisa bikhra hun

Ki jaisa bachcha kitaben idhar-udhar kar de

‘Vasim’ kis ne keha tha ki yuun ghazal keh kar

Ye phool jaisi zamin ansuon se tar kar de

…………………………………….

Mera kya tha main tuuta ki bikhra reha

Tere hathon mea to ik khilauna reha

Ik zara si ana ke liye ‘umr bhar

Tum bhi tanha rehe main bhi tanha reha

Tere jaane ka manzar hi ghum-khvar tha

Zindagi bhar jo ankhon se lipta reha

Mera ehsas sadiyon pe phaila hua

Aisa aansu jo palken badalta reha

Ghar ki sab raunaqen mujh se aur main ‘vasim’

Taaq par ik diye jaisa jalta reha

…………………………….

khushi ka saath mila bhi to dil pe baar reha

Main aap apni tabahi ka zimmedar reha

Adhure khwab gaye din ajaan andeshe

Meri hayat pe kis kis ka ikhtiyar reha

Jo sab pe bojh tha ik shaam jab nahin lauta

Usi parinde ka shakhon ko intizar reha

Vo koi aur hi jazba tha sirf pyaar na tha

Tujhe jo apna jatane ko be-qarar reha

Na jaane kis ka ta.alluq tha mere saath ‘vasim’

Koi bhi duur hua mujh ko sazgar reha

…………………………….

Na jaane kyuun mujhe us se hi khauf lagta hai

Mire liye jo zamane ko chhod aaya hai

Andheri shab ke havalon mea us ko rakkha hai

Jo saare shahr ki ninden uda ke soya hai

Rafaqaton ke safar mea to be-yaqini thi

Ye fasla hai jo rishta banaye rakhta hai

Vo khwab the jinhen hum mil ke dekh sakte the

Ye bar-e-zist hai tanha uthana padta hai

Humea kitabon mea kya dhundne chale ho ‘vasim’

Jo hum ko padh nahin paaye unhin ne likkha hai

………………………………

Mite vo dil jo tere ghum ko le ke chal na sake

Vahi charagh bujhaye gaye jo jal na sake

Hum is liye nayi duniya ke saath chal na sake

Ki jaise rang ye badli hai hum badal na sake

Main un charaghon ki umr-e-vafa ko rota hun

Jo ek shab bhi mire dil ke saath jal na sake

Main vo musafir-e-ghumgin hun jis ke saath ‘vasim’

khizan ke daur bhi kuchh duur chal ke chal na sake

……………………………….

Yahi bazm-e-aish hogi yahi daur-e-jam hoga

Magar aaj ka tasavvur yahan kal haram hoga

Main kuchh is tareh jiya hun ki yaqin ho gaya hai

Mire ba.ad zindagi ka bada ehteram hoga

Meri ziist ik janaza hai jo reh-e-waqt mea hai

Jo thakenge din ke kandhe to supurd-e-shum hoga

Yahi hadsat-e-ghum hain to ye dar hai jeene vaalo

Koi din mea zindagi ka koi aur naam hoga

……………………………..